O Lajošis sas ciknoro. Sas baro mariben u phenďa kija peste:
„Džava kijo partizana, chudava puška, murdarava paru Ňemcen u avava pale khere.“

Ke amende sas bare veša, odoj pes ľikerenas o partizana. Ta oda Lajošis gejľa ke lende. Avľa odoj paš o partizana u phenen le Lajošiske: „E puška bareder sar tu. Džanes so, pašineha le trine gurumňen.“ Ta jekh kurko pašinlas le gurumňen. Jekhvareste leske sas phares pal e Marča u iľa pes te džal khere. Avľa kija Ondava, chudňa te chudel mačhen, bo sas bares bokhalo u mucinďa o paňi andre Onadava.

Akurat khatar e odi Ondava džanas o Ňemci le grajenca, kamle grajen te pijel paňi, no našťi, bo paňi sas mutno u o graja kamen žužo paňi. O Ňemci gejle le grajenca avreder, odoj len dochudne o Rusi le partizanenca, zaile le Ňemcen.

Ačhiľa agor le baro maribnaske. Le Lajošis dine medajla the irinde leske paperis, hoj sas partizanos. Sar pes ašarelas le Romenge, ta o Roma lestar asanas. O Podža sas slugadžis paše le Slobodaskeri armáda, ta leske phenelas: „Dža, garuv pes andro kher, bo e puška sas bareder sar tu.“ O Lajošis lestar daralas. Jekhvar les kamľa the te čhivel andre chaňig, sar pes ašarelas, hoj sas baro partizanos.

 

%d bloggers like this: