I.

Dežis
Ago, tire kale jakha sar drakha,
vera tuke lav, hoj tut zorales kamav.

Aga
Palemarďi som, Deži, arakh tuke avra.

Dežis
Na paťav tuke, paťivaľi sal, ča man kam,
andre miro jilo kerďom tuke than.

Aga
Me kamav le Julos, tu man mareha,
leskeri lavuta mange o šero diliňarďa.

Dežis
Na marava tut! Čumidava tre bala,
pal tiro šukariben merav andre žaľa.
Keci raťa užaravas tel tumari blaka!
Mro jilo nasvaľol, kamav tut bares,
ča tu man šaj sasťares.

La Agake peren o apsa andral o jakha.

Dežis
Ma rov pal o Julos, hin les but piraňa.
Ma paťa leske, jov tut igen pokerďa,
mukhela tut, hijaba tuke o šero diliňarďa.

Aga
O šero man dukhal, so čori kerava?

Dežis
Me vaš tuke, Ago, mire jakha dava.

Iľa la andre angaľi, andro veš laha gejľa.
Obchudel le Dežis, pro Julos gondoľinel.
Šilales labol o čhon, o kham tele pejľa.
Kamavenas pes calo rat tel o čercheňa.
O Dežis na džanel, soske la Agake peren o apsora,
soske bibachtales čerchinen o prajťora.

Dežis
Imar sal miri romňi, Ago, na mukhava tut šoha.

II.

Sas o bijav baro duje kurkenca,
sar bare raja o Roma Romňenca,
chanas, pijenas, bašavnas, khelenas,
o čhavore lenge pro pindre uštarenas.
O Dežis barikano la Aga bonďarel,
o Julos choľamen dukhades bašavel,
paš e cimbalma giľavel e Aga brigate,
sar pre bijaveste o Romňa pal late.
O Dežis džanľa, hoj pal e daj lake pharo,
čumidel lake tele pal o muj o apsa.

Dežis
Mri romňi, le khameskri žara andre tute barol!

III.

Jekh berš pregejľa, e jara, o ňilaj,
o jejsos – jevende
o Roma baro balos kerde.
O čhaja šukar sar pro veš prajta,
o čhave – e mašľa tel e men,
rajkanes uchamen o bala.
E Aga – e rokľa dži kije phuv,
barikaňi sar raňi phirel pal e zala.
Pal late džan le Juloskere labune jakha.
E Aga le Dežis na dikhel, šoha les na kamelas,
Avri paš e fala le Juloske andre angaľi pejľas,
lengere jile labon sar duj bare jaga.
Jaj, bibachtaľi Aga, čori Aga!

O Dežis sar dilino peskera romňa rodel.

Phuri
Dža avri, dikheha. Ma dara, marla la o Del!

O Dežis chuťiľa, le Juloskri lavuta
churďarďa tel o pindre.

Dežis
Mi marel les e guta!

Phagerďa e bugova, e cimbalma previsarďa,
sar bije goďi le Juloskere phrales marďa,
marel le muršen, le džuvľen, mek le cikne čhavoren.

Phuri
Jaj Devla, imar o phandle aven!
O jakha tuke avri te čuľan, lubňije bibachtaľi!
Pr’amende bida anďal! Tu oleske sal došaľi!

E Aga andre Julaskeri angaľi rovel the asal

Aga
Zoraha čorďa man o Dežis, miro rom!
Akana mange phundriľa miro drom.

IV.

Le Dežis ligende andre bertena, pro vasta phare trasta.
Bertenate bešel, churde apsa čhorel,
pre peskeri romňi dukhaha gondoľinel.

Dežis
Na irinďa mange aňi jekh ľiloro,
šilale murende bešav korkororo.

Bertenate cikňi blaka zathoďi trastenca,
perdal late dikhel o Dežis rovľarde jakhenca.

Dežis
Av ke ma, tu gulo suno, av ajso lačho,
ča te delas o Del, kaj o čačipen te n’avel čačo!

O Dežis zasovel, džal sune la Agaha.

Dežis
Aviľal ke ma, Ago, šunav tut, sar giľaves!
Mri šukar romňori, me džanav, hoj man kames!
Sar cikňa čhajora ľikeravas tut andre angaľi,
tre jakha asanas, tu salas bachtaľi!
Leperes, sar delas brišind, tu andre šil izdrahas,
mro gerekos pre tu čhiďom, teštoha tut taťaravas,
khere man obchudňal, bares pes kamavahas,
tosara zasuťal pre miro jilo, me pre tiro.
Chav tro jiloro, chav tro ratoro,
užar pre ma, mri romňori, imar ča jekh beršoro.

V.

E Aga le Dežis na leperel, pal o Julos merel.
O Roma la koškeren, hoj le Dežis thoďa pre men jekh berš bertena.
Le Juloha pes dovakerďa e Aga, hoj dujdžene denašena.
O čhon lenge o drom sikhavel,
e balvaj andro prajta rovľarde giľa bašavel.

Julos
Šun, Ago, tel o čhonoro le mange vera,
hoj dži tiro meriben mri romňi aveha.

Aga
O Dežis avela khere!

Julos
O Dežis degešis – me lavutaris baro!
Paš mande dživeha – paš leste tut ela pharo!
Thov tut pro lange khoča, rozmukh tre kale bala,
solachar, hoj man šoha na mukheha.

Thoďa pes pro lange khoča rozmukhle balenca.
Kaľiľa o čhon, o čercheňa rovenas rupune apsenca.

Aga
Lav tuke vera, hoj tut šoha na mukhava.

VI

Jekhe beršeha avel o Dežis khere andral e bertena.
La Agake cinďa somnakune čeňa,
topanki, khosno viragenca, pharuňi bluza, rokľica fodrenca.

Dežis
Sako rat, mri romňi, džavas tuha sune,
mro šuťardo jilo cinďarenas tre apsa rupune.

Sar dural khere avelas, e phuri les užarel pro drom.

Phuri
Ma siďar khere, Deži, la Aga hin aver rom!
Le Juloha svetos phirel.

Dežis
Mri dukh andre lengere jile!

E bari čhuri iľas, denašel pal e Aga.

Dežis
Jaj Devla, pro meriben man te odsudzindehas!
Pre kapura bertenakri šel kľigina te dinehas!
The tel e kaľi phuv me tumen rodava,
mizere tuke, Ago, sar tut arakhava.

Rodelas len čhona pal savore Roma, veša, kandre, barale droma.
Jekhvar kijaraťi pal o romane khera andre čar
šunďol e lavuta, e Aga giľavel. Ačhiľa sar bar.

Aga
Bar barestar o paňi džal,
mre jilestar o rat čuľal,
čuľal, čuľal bo mušinel,
ča mro binos peha na lel.

Dežis
Av manca khere, Ago!

Aga
Deži! Na, le Juloske vera iľom.

Dežis
Mange sal romňi, jov ča tro pirano!

Aga
Leskere jileha miro jilo phandlo.

Dežis
Jov tut diliňarďa peskera lavutaha,
šelen diliňarla – ča dukh paš leste chaha,
adaďives tut mek kamel, tajsa tut mukhela!
Na! Na chaha dukh, mri romňi, aňi me – aňi tu!

O Dežis e čhuri lel, andro jilo la Agake la demel,
premardo čhuraha pre lakero teštos perel.
O Julos kamel le Dežis te hazdel – dikhel: murdardo hino.

Phuri
Jaj, Romale, ma rušen pre lende!
E balvaj lenge mulane giľa giľavel,
kaštune banďon upral lende,
o čercheňa peskere apsenca moren lengero binos tele.
Le Juloskeri lavuta laľi, muľi ačhiľa,
o Julos šoha khere na aviľa.
Aľe ola trin terne dživen, na meren –
bo pal lende paramisa o Roma vakeren.

%d bloggers like this: